കോട്ടാങ്ങൽ  പടയണി 

                                                      photo courtesy: Google images.
                                               

പത്തനംതിട്ട: പത്തനംതിട്ടയിലെ കോട്ടാങ്ങൽ എന്ന ഗ്രാമം പ്രശസ്തമാകുന്നത് പടയണി എന്ന അനുഷ്ഠാന കലയിലൂടെയാണ്.കേരളത്തിലെ പല ക്ഷേത്രങ്ങളിലും പടയണി ഉണ്ട് എന്നാലും പാരമ്പര്യ ചാരുത മങ്ങാതെ പ്രകൃതികോലങ്ങൾ നിറഞ്ഞു നിൽക്കുന്നു എന്ന സവിശേഷതയാണ് കോട്ടാങ്ങൽ ശ്രീ മഹാഭദ്രകാളി ക്ഷേത്രത്തിന്റെ പ്രത്യേകത. ഈ ക്ഷേത്രത്തിൽ പടയണി അരങ്ങേറുന്നത് ക്ഷേത്രോത്സവമായിട്ടാണ്. ഇതുകൊണ്ട് തന്നെ കോട്ടാങ്ങൽ പടയണി മറ്റുള്ളതിൽ നിന്നും ഏറെ വ്യത്യസ്തമാണ്. പ്രകൃതിയും മനുഷ്യനും വ്യത്യസ്തരല്ല എന്നാണ് ഈ പടയണി ഉറക്കെ പറയുന്നത്.

                   ധനുമാസത്തിലെ ഭരണി നാളിൽ ചൂട്ട് വയ്പ്പ് നടത്തി തുടങ്ങി 28 ദിവസം നീണ്ടു നിൽക്കുന്ന ഭക്തിനിർഭരമായ ചടങ്ങുകൾ, മകരമാസത്തിലെ ഭരണി നക്ഷത്രത്തിൽ സമാപിക്കും.ഇതിൽ അവസാന 8 ദിവസങ്ങൾക്ക് പ്രാധാന്യമുണ്ട്. രണ്ടു കരക്കാരുടെ നേതൃത്വത്തിലാണ് പടയണി നടത്തുന്നത്. പാരമ്പര്യമനുസരിച്ച് കോട്ടാങ്ങൽ കരക്കാരുടെയും കുളത്തൂർ കരക്കാരുടെയും നേതൃത്വത്തിലാണ് പടയണി നടക്കുന്നത്. കോട്ടാങ്ങൽകരക്കാർക്ക് വേണ്ടി പുളിക്കൽ കൊട്ടാരത്തിലും കുളത്തൂർ കരക്കാർക്ക് താഴത്ത് വീട്ടിൽ കൊട്ടാരത്തിലും പടയണി നടത്തും. പടയണിയുടെ ആദ്യത്തെ 20 ദിവസം ഈ വീടുകളിൽ വച്ച് പടയണിയുടെ സാധിപ്പ് നടത്തും. 8 ദിവസം മാത്രമാണ് ക്ഷേത്രത്തിൽ വിവിധ കലാപരിപാടികളോടുകൂടി പടയണി നടത്തുന്നത്. രണ്ട് കലാകാരന്മാരുടെ ചൂട്ട് വയ്പിനു ശേഷമാണ് കോലങ്ങൾ  തുള്ളുന്നത്. ചൂട്ട് വയ്പ്പ് എന്നാൽ ഭഗവതിയെ കളത്തിനകത്തു കുടിയിരുത്തുന്നു എന്നാണ് സങ്കൽപ്പം. രാത്രി തപ്പ് , കൈമണി തുടങ്ങിയ വാദ്യോപകരണങ്ങൾ ഉപയോഗിച്ചുള്ള പടയണി പാട്ടുകളുടെ അകമ്പടിയോടെ കത്തിച്ച ചൂട്ടു വെളിച്ചത്തിൽ കോലങ്ങൾ തുള്ളും. ഗണപതിക്കോലം, ഭൈരവി, യക്ഷി, പക്ഷി, കുതിര ,സുന്ദരയക്ഷി, മറുത, മാടൻ ,കാലൻ, മംഗള ഭൈരവി തുടങ്ങിയ വിവിധ കോലങ്ങൾ 8 ദിവസം കെട്ടിയാടും .

                  വലിയ പടയണി നാളിലാണ് വേല കളി അരങ്ങേറുന്നത്. ഒരു വർഷത്തെ ചിട്ടയായ പരിശീലനത്തിനു ശേഷം കളത്തിൽ ഇറങ്ങുന്ന പോരാളികൾ പയറ്റുമുറകൾ അവതരിപ്പിക്കുന്നത് , പഴയ രാജ സൈനികരെ ഓർമ്മിപ്പിക്കുന്നു. രോഗങ്ങൾ മാറാനും, ഭൂത യക്ഷി ബാധകൾ ഒഴിയാനും, കുടുംബൈശ്വര്യത്തിനും വേണ്ടിയാണ് പടയണി കെട്ടിയാടുന്നത്.